Маъно таржимаси:
2. Ҳамд оламларнинг Робби – Аллоҳгадир.
3. У Роҳман ва Роҳиймдир.
4. Жазо-мукофот кунининг эгасидир.
5. Фақат Сенгагина ибодат қиламиз ва фақат Сендангина ёрдам сўраймиз.
6. Бизни тўғри йўлга ҳидоят қилгин.
7. Ўзинг неъмат берганларнинг йўлига: ғазабга қолганларникига ҳам эмас, адашганларникига ҳам эмас.

Маъно таржимаси:
1. Нима ҳақида сўрашади?.
2. Улкан, муҳим хабар ҳақида.
3. Шундайки, улар у ҳақида ихтилоф қилувчидирлар.
4. Йўқ! Улар тезда билурлар.
5. Яна йўқ! Улар тезда билурлар!
6. Ерни бешик қилиб қўймадикми?
7. Ва тоғларни қозиқлар…
8. ва сизларни жуфт қилиб яратдик.
9. Ва уйқуларингизни роҳат қилиб қўйдик.
10. Ва тунни либос қилдик.
11. Ва кундузни тирикчилик қилдик.
12. Тепангизга етти мустаҳкам(осмон)ни бино қилдик.
13. Ва зиё ва ҳарорат таратувчи чироқ ҳам қилдик.
14. Ва сиқилган(булут)лардан шариллаган сув туширдик…
15. у билан дон ва наботот чиқаришимиз учун…
16. ва дарахтлари бир-бирига киришган бўстонлар.
17. Албатта, ажрим куни вақти белгилангандир.
18. У кунда дудга пуфланур ва тўп-тўп бўлиб келурсиз.
19. Осмон очилиб, эшикларга айланур.
20. Тоғлар ўрнидан кўчирилиб, саробга айланур.
21. Албатта, жаҳаннам пойлаб турувчидир.
22. Туғёнга кетганлар учун қайтар жойдир.
23. Улар унда замонлар бўйи қолувчидирлар.
24. Улар унда совуқ ҳам, ичимлик ҳам татий олмаслар.
25. Фақат қайноқ сув ва йирингни (татирлар)…
26. Мувофиқ жазо ўлароқ.
27. Чунки улар ҳисоб-китоб бўлишини кутмаган эдилар.
28. Ва Бизнинг оятларимизни ёлғонга чиқаришган эди, ёлғонга!
29. Биз ҳар бир нарсани китобга жамлаб қўйганмиз.
30. Бас, татиб кўринглар, сизларга азобдан бошқани зиёда қилмасмиз.
31. Албатта, тақводорларга ютуқ,
32. боғ-роғлар, узумзорлар…
33. ва янги бўйи етган бир хил ёшдаги қизлар…
34. ва тўлдирилган қадаҳлар бордир.
35. У ерда бекорчи ва ёлғон гапларни эшитмаслар.
36. Роббингдан мукофот, совға ҳисобидандир.
37. У осмонлар, ер ва уларнинг орасидаги барча нарсаларнинг Робби, Роҳмандир. Унинг ҳузурида ҳеч ким хитоб қилишга қодир бўлмас.
38. Ўша Кунда Руҳ ва фаришталар саф бўлиб турарлар. Роҳман изн берганлар ва тўғри сўзлаганлардан ўзгалар ҳеч гапира олмаслар.
39. У ҳақ Кундир. Ким хоҳласа, ўз Роббига қайтар йўл оладир.
40. Албатта, Биз сизларни яқин келажакдаги азобдан қўрқитдик. У Кунда киши ўз қўли тақдим қилган нарсага назар соладир. Ва кофир: «Қани эди, тупроқ бўлиб кетсам», – дейдир.

Маъно таржимаси:
1. Шиддат билан (жонни) суғуриб олувчилар билан қасам.
2. Юмшоқлик-ла суғуриб олувчилар билан қасам.
3. Сузишда сузувчилар билан қасам.
4. Ўзишда ўзувчилар билан қасам.
5. Ишнинг тадбирини қилувчилар билан қасам.
6. Ларзага тушувчи ларзага тушган Кунда...
7. Эргашувчи унга эргашганда...
8. Қалблар ўша Кунда титровчидир.
9. Уларнинг кўзлари қўрқувчидир.
10. Улар дерлар: «Биз албатта, аввалги ҳолга қайтарилувчилармизми?
11. Чириган суяк бўлганимиздан кейин ҳам-а?
12. Агар шундай бўлса, бу зиёнли қайтиш-ку!»
13. Албатта, у (қиёмат) бир қичқириқ, холос.
14. Қарабсизки, улар майдонда.
15. Сенга Мусонинг хабари келдими?
16. Қачонки Робби унга муқаддас Туво водийсида нидо қилди:
17. «Фиръавннинг ҳузурига бор, албатта, у туғёнга кетди.
18. Бас, айт: «Сенда покланишга (рағбат) борми?
19. Ва сени Роббингга ҳидоят қилсам, шоядки, қўрқсанг».
20. Ва унга катта оят(аломат)ни кўрсатди.
21. Ул ёлғончига чиқарди ва осий бўлди.
22. Сўнг ортига ўгирилиб, тезлаб кетди.
23. Кейин (одамларни) тўплади ва нидо қилди.
24. Ва: «Мен сизларнинг энг олий Роббингизман», – деди.
25. Бас, Аллоҳ уни аввалги ва охирги(гуноҳ)лари учун бездирувчи иқобга олди.
26. Албатта, бунда қўрқадиганлар учун ибрат бордир.
27. Сизларни яратиш қийинми ёки У Зот бино қилган осмонними?
28. Унинг шифтини юқори кўтарди ва бекаму кўст қилиб қўйди.
29. Тунни қоронғи ва кундузни ёруғ қилди.
30. Ва ундан сўнг ерни тухум шаклида қилди.
31. Ундан сувни, ўт-ўланларни чиқарди.
32. Ва тоғларни барқарор қилди,
33. сизларга ва чорваларингизга баҳрамандлик бўлиши учун.
34. Вақтики катта офат (қиёмат) келса…
35. У Кунда инсон қилган ҳатти-ҳаракатларини эслайдир.
36. Ва дўзах кўрадиганларга зоҳир қилинадир.
37. Аммо кимки туғёнга кетган бўлса…
38. ва дунё ҳаётини устун қўйган бўлса…
39. бас, албатта, дўзах (унга) жой бўладир.
40. Ва аммо ким Роббининг ҳузурида туришдан қўрққан ва нафсни ҳавойи хоҳишдан қайтарган бўлса...
41. бас, албатта, жаннат (унга) жой бўладир.
42. Сендан Соат ҳақида: «Қачон бўлур?» – деб сўрашадир.
43. Унинг зикрини сен қандай билардинг?!
44. Унинг интиҳоси Роббинггагина хос.
45. Албатта, сен қўрқувчиларни ундан огоҳлантирувчисан, холос.
46. Уни кўрган кунлари худди дунёда кечки пайт ёки чошгоҳдан бошқа турмаганга ўхшарлар.

Маъно таржимаси:
1. Афтини буриштирди ва юз ўгирди...
2. ҳузурига кўзи ожиз киши келганига.
3. Сенга не билдирар, эҳтимол, у покланар.
4. Ёки эслатма олар, бас, эслатиш унга манфаат берар.
5. Аммо истиғно қилганга эса...
6. Сен у томонга интиласан.
7. У покланмаса, сенга ҳеч нарса бўлмас.
8. Аммо ҳузурингга шошилиб келган…
9. ва қўрққандан эса...
10. бас, сен ундан машғул бўласан.
11. Йўқ! Албатта, улар (Қуръон оятлари) эслатмадир.
12. Ким хоҳласа, уни эслайдир.
13. Ҳурматланган саҳифалардадир.
14. Олий қадардирлар, поклангандирлар.
15. Элчиларнинг қўлларидадир –
16. ҳурматланган ва ўта яхшиларнинг.
17. Инсонга лаънат бўлсин, бунча ҳам кофир бўлди я!
18. Уни қайси нарсадан яратди?
19. Уни нутфадан яратди ва уни ўлчовли қилди.
20. Сўнгра (чиқиш) йўлини осон қилди.
21. Сўнгра уни ўлдирди ва қабрга киргизди.
22. Сўнгра қачон хоҳласа, уни қайта тирилтиради.
23. Йўқ! (У Зот) ўзига қилган амрни бажармади.
24. Инсон ўз таомига назар солсин.
25. Албатта, Биз сувни роса қуйиб қўйдик.
26. Сўнгра ерни ўзига хос ёрдик.
27. (Биз) унда донни ўстирдик…
28. ва узум ва кўкатларни…
29. ва зайтун ва хурмоларни…
30. ва қуюқ, қалин боғу бўстонларни…
31. ва мева чеваю ўт-ўланларни…
32. сизларга ва чорваларингизга наф бўлиши учун.
33. Вақтики кар қилувчи овоз келса,
34. у Кунда киши ўз ака-укасидан қочадир…
35. ва онаси ва отасидан…
36. ва хотини ва бола-чақасидан.
37. У Кунда улардан ҳар бир кишини овора қилувчи ўз иши бор.
38. У Кунда порлоқ чеҳралар бор –
39. кулувчилар, хушхабардан хурсандлар.
40. У Кунда ғубор босган чеҳралар бор –
41. устини зулмат қоплаган.
42. Улар – ана ўшалар кофирлар ва фожирлардир.

Маъно таржимаси:
1. Вақтики қуёш букланса…
2. ва вақтики, юлдузлар узилиб тушса…
3. ва вақтики, тоғлар сайр қилдирилса…
4. ва вақтики, ҳомиласи ўн ойли туялар қаровсиз қолса…
5. ва вақтики, ваҳший ҳайвонлар тўпланса…
6. ва вақтики, денгизлар алангалантирилса…
7. ва вақтики, нафслар жуфтлаштирилса…
8. ва вақтики, тириклай кўмилган қиздан сўралса:
9. «Қайси гуноҳ учун ўлдирилган?»…
10. ва вақтики, саҳифалар очилса…
11. ва вақтики, осмон қўпорилса…
12. ва вақтики, дўзах ловуллатилса…
13. ва вақтики, жаннат яқинлаштирилса…
14. ҳар бир жон нима ҳозирлаганини биладир.
15. (Кундузи) яширинувчилар билан қасам.
16. (Кечалари) юрувчи, беркинувчилар билан…
17. Қоронғулиги-ла кириб келган тун билан қасам.
18. Нафас олиб кириб келган тонг билан қасам.
19. Албатта, у (Қуръон) ҳурматли элчининг сўзидир.
20. У қувватли, Аршнинг эгаси ҳузурида мартабаси олийдир.
21. Итоат қилинадиган, омонатлидир.
22. Соҳибингиз мажнун эмасдир.
23. Батаҳқиқ, уни очиқ-ойдин уфқда кўрди.
24. Ва у ғайбга бахил эмасдир.
25. Ва у (Қуръон) тошбўрон қилинган шайтоннинг сўзи эмасдир.
26. Бас, қаёққа кетмоқдасиз?!
27. У (Қуръон) оламларга эслатмадан бошқа нарса эмасдир…
28. сизлардан мустақим бўлишни хоҳловчилар учун.
29. Оламларнинг Робби Аллоҳ хоҳласагина, сизлар хоҳлайсизлар.

Маъно таржимаси:
1. Вақтики, осмон ёрилса…
2. ва вақтики, юлдузлар сочилиб кетса…
3. ва вақтики, денгизлар портлатилса…
4. ва вақтики, қабрлар ағдарилса…
5. ҳар бир жон – нимани олдинга сурди-ю, нимани ортга сурди – биладир.
6. Эй инсон! Карамли Роббинг хусусида сени нима алдаб қўйди?!
7. У сени яратди, тўла-тўкис ва мўътадил қилди.
8. Ўзи хоҳлаган суратда сени йиғди.
9. Йўқ!!! Балки сиз жазо мукофотни ёлғонга чиқармоқдасиз!!!
10. Ҳолбуки, устингиздан кузатиб турувчилар бордир.
11. Муҳтарам котиблардир.
12. Нима қилаётганингизни биладиганлардир.
13. Албатта, аброрлар неъматланишдадирлар.
14. Ва албатта, фожирлар дўзахдадирлар.
15. Унга жазо мукофот куни кириб, куядирлар.
16. Ва улар ундан ғойиб бўлувчи эмасдирлар.
17. Ва жазо мукофот куни нима эканини сенга нима билдирди?
18. Сўнг жазо мукофот куни нима эканини сенга нима билдирди?
19. Ўша Кунда ҳеч бир жон бошқа бир жон учун бирор нарса қилиш имконига молик эмас. У Кунда иш Аллоҳнинг Ўзига хосдир.

Маъно таржимаси:
1. Вайл бўлсин ўлчовдан уриб қолувчиларга.
2. Улар одамлардан нарса ўлчаб олсалар, тўлиқ оларлар.
3. Ва агар уларга ўлчаб ёки тортиб берсалар, камайтирарлар.
4. Ана шулар албатта қайта тирилтирилишларини ўйламайдиларми?
5. Буюк бир Кунда.
6. У Кунда одамлар оламлар Робби ҳузурида тик турарлар.
7. Йўқ! Албатта, фожирларнинг китоби «сижжийн»дадир.
8. «Сижжийн» не эканини сенга нима билдирди?!
9. У ёзилган китобдир.
10. Ўша Кунда ёлғонга чиқарувчиларга вайл бўлсин!
11. Улар жазо мукофот кунини ёлғонга чиқарурлар.
12. Уни фақат тажовузкор ва сергуноҳгина ёлғонга чиқарур.
13. Қачон унга оятларимиз тиловат қилинса, «Аввалгиларнинг афсоналари», – дер.
14. Йўқ! Уларнинг қилган касблари қалбларига моғор бўлиб ўрнашиб қолгандир.
15. Йўқ!!! Албатта, улар ўша кунда ўз Роббларидан тўсилганлардир.
16. Сўнгра, албатта, улар дўзахга кириб, куювчилардир.
17. Сўнгра: «Мана бу сизлар ёлғонга чиқариб юрган нарса», – дейилур.
18. Йўқ!!! Албатта, аброрларнинг китоби «Иллиййийн»дадир.
19. «Иллиййийн» не эканини сенга нима билдирди?!
20. У ёзилган китобдир.
21. Унга муқарраб(фаришта)лар шоҳид бўлурлар.
22. Албатта, аброрлар неъматланишдадирлар.
23. Пардали баланд сўрилар устида назар солиб турурлар.
24. Уларнинг чеҳраларидан неъматланиш яшноқлигини билиб олурсан.
25. Улар ниҳоятда пок, муҳрланган ичимликдан ичирилурлар.
26. Унинг охири мискдир. Ва мусобақа қилувчилар шу нарса учун мусобақа қилсинлар.
27. Унинг аралашмаси «таснийм»дандир.
28. У бир булоқдирки, ундан муқарраблар ичарлар.
29. Албатта, жиноят қилганлар иймон келтирганлар устидан кулар эдилар.
30. Қачон уларнинг ёнидан ўтсалар, (масхаралаб) кўз қисардилар.
31. Қачон аҳллари ҳузурига қайтсалар, ҳузурланиб қайтардилар.
32. Ва қачон у(мўмин)ларни кўрсалар, «Албатта, анавилар адашганлар», – дер эдилар.
33. Ҳолбуки, уларнинг устидан кузатувчи этиб юборилганлари йўқ-ку!
34. Энди бу Кунда иймон келтирганлар кофирлар устидан куларлар.
35. Пардали, баланд сўрилар устида назар солиб турарлар.
36. Кофирлар қилган ишларининг «савоби»ни олдилармикан?!

Маъно таржимаси:
1. Вақтики, осмон ёрилса…
2. ва ўз Роббига қулоқ осди ва шундай бўлиши керак эди.
3. Ва вақтики, ер чўзилса...
4. ва ўз ичидаги нарсаларни отиб чиқариб, холи қолса…
5. ва ўз Роббига қулоқ осди ва шундай бўлиши керак эди.
6. Эй инсон! Албатта, сен Роббингга етгунингча, тинмай уринасан. Бас, Унга йўлиқувчисан!
7. Аммо кимнинг китоби ўнг тарафдан берилса,
8. тезда, осонгина ҳисоб қилинур.
9. Ва аҳли ҳузурига хурсанд ҳолда қайтиб борур.
10. Ва аммо кимнинг китоби орқа тарафидан берилса...
11. у тезда ўзига ҳалокатни чақирур.
12. Ва ловуллаган оловга кириб, куюр.
13. Албатта, у (бу дунёда) ўз аҳли билан хурсанд бўлиб ўтган эди.
14. Чунки у ҳеч қачон орқага қайтмасликни ўйлаган эди.
15. Ҳа! Албатта, Робби уни доимо кўриб турувчи эди.
16. Шафақ билан қасам.
17. Тун ва у ўраб олган нарсалар билан қасам.
18. Ва тўлин ой билан қасам.
19. Албатта, табақама-табақа минасизлар.
20. Нима бўлган уларга, иймон келтирмаслар?!
21. Ва қачон уларга Қуръон ўқилса, сажда қилмаслар. ۩
22. Балки кофирлар ёлғонга чиқарурлар.
23. Ҳолбуки, Аллоҳ (қалбларида) нимани сақлаётганларини яхши билувчидир.
24. Уларга аламли азобнинг «хушхабар»ини бер.
25. Иймон келтирганлар ва яхши амаллар қилганлар мустасно. Уларга миннатсиз, битмас-туганмас ажрлар бор.

Маъно таржимаси:
1. Буржлар эгаси бўлган осмон билан қасам.
2. Ва ваъда қилинган кун билан қасам.
3. Шоҳид бўлган ва шоҳид бўлинган билан қасам.
4. «Ухдуд» соҳибларига лаънат бўлсин.
5. У ёқилғиси кўп ўтдир.
6. У(кофир)лар унинг атрофида ўтирибдилар.
7. Ва улар мўминларга қилаётган нарсаларига ўзлари гувоҳдирлар.
8. Ва улар мўминлардан ўта иззатли, ўта мақталган Аллоҳга бўлган иймондан бошқа «айб» топа олмадилар.
9. У осмонлару ернинг подшоҳлиги Унга хос бўлган Зотдир. Ва Аллоҳ ҳар бир нарсага гувоҳдир.
10. Албатта, мўмин ва мўминаларни фитна қилиб, сўнгра тавба қилмаганларга – ана ўшаларга жаҳаннам азоби ва ёниш азоби бордир.
11. Албатта, иймон келтирган ва солиҳ амалларни қилганларга остларидан анҳорлар оқиб турган жаннатлар бор. Ана ўша катта ютуқдир.
12. Албатта, Роббингнинг чангали жуда ҳам шиддатлидир.
13. Албатта, У Ўзи бошлайдир ва қайтарадир.
14. Албатта, У Ўзи бошлайдир ва қайтарадир.
15. Арш эгаси, шарафи ва қадри улуғдир.
16. Ирода қилганини қилувчидир.
17. Сенга лашкарларнинг хабари келдими –
18. Фиръавн ва Самуднинг?
19. Балки, кофирлар ёлғонга чиқаришадир?
20. Ҳолбуки, Аллоҳ уларнинг ортидан иҳота қилиб турувчидир.
21. Йўқ!!! У Қуръони Мажиддир.
22. Лавҳул Маҳфуздадир.

Маъно таржимаси:
1. Осмон билан қасам ва ториқ билан қасам.
2. Ториқ нималигини сенга не билдирди?
3. У нур сочиб турувчи юлдуздир.
4. Ҳеч бир жон йўқки, унинг муҳофаза қилиб турувчиси бўлмаса.
5. Инсон нимадан яралганига назар солсин.
6. У отилиб чиқувчи сувдан яралгандир.
7. У пушт ва кўкрак суяги орасидан чиқадир.
8. Албатта, У Зот уни қайтаришга қодирдир…
9. Сирлар фош бўладиган Кундадир.
10. Бас, унда қувват ҳам, ёрдамчи ҳам бўлмайдир.
11. Қайтувчининг эгаси бўлган осмон билан қасам.
12. Ёриб чиқувчининг эгаси бўлган ер билан қасам.
13. Албатта, у (Қуръон) ажратувчи сўздир.
14. Ва у ҳазил эмасдир.
15. Албатта, улар ҳийла қилурлар.
16. Ва Мен ҳам «ҳийла» қилурман.
17. Бас, кофирларга муҳлат бер. Ҳа, уларга озгина муҳлат бер.

Маъно таржимаси:
1. Олий қадар Роббинг исмини поклаб ёд эт.
2. У яратган ва бекаму кўст қилган Зотдир.
3. У ўлчов билан қилган ва ҳидоятга бошлаган Зотдир.
4. У ўт-ўланни чиқарган Зотдир.
5. Бас, уни қорамтир хас хашак қилгандир.
6. Биз сенга қироат қилдирамиз, бас, сен эсдан чиқармассан.
7. Аллоҳ хоҳлагани мустасно. Албатта, У ошкорни ҳам, махфий нарсаларни ҳам биладир.
8. Ва сени осон йўлга муяссар қиламиз.
9. Бас, агар эслатма манфаат берса, эслатгин.
10. Албатта, У Зотдан қўрққан эсга оладир.
11. Ва бадбахтгина ундан четда бўладир.
12. У катта оловга кириб, куядир.
13. Сўнгра унинг ичида ўлмай ҳам, тирилмай ҳам қоладир..
14. Дарҳақиқат, ким покланса, зафар топадир...
15. ва Робби исмини зикр қилса ва намоз ўқиса.
16. Бироқ (сизлар) бу дунё ҳаётини устун қўясизлар.
17. Ҳолбуки, охират яхшироқ ва боқийроқдир.
18. Албатта, бу аввалги саҳифаларда бордир…
19. Иброҳим ва Мусо саҳифаларидадир.

Маъно таржимаси:
1. Батаҳқиқ, сенга Ғошиянинг хабари келди.
2. Ўшал Кунда бир чеҳралар қўрқувчидир…
3. Ишловчидир, чарчовчидир.
4. Ўта қизиган ўтга кириб, куядир.
5. Қайнаб турган булоқдан суғориладилар.
6. Уларга тикандан бошқа таом йўқдир.
7. На семиртирмас ва на очликни кетказмас.
8. Ўшал Кунда бир чеҳралар неъматланувчидир.
9. Саъй-ҳаракатларидан розидирлар.
10. Олий даражали жаннатдадирлар.
11. Унда бекорчи гапларни эшитмаслар.
12. Унда оқиб турган булоқлар (бордир)…
13. Унда баланд-баланд сўрилар…
14. ва тайёрлаб қўйилган қадаҳлар…
15. ва саф-саф қилиб тизилган ёстиқлар…
16. ва ҳамма ёққа тўшалган гиламлар (бордир).
17. Назар солмасмилар туянинг қандай яратилганига…
18. ва осмоннинг қандай кўтарилганига…
19. ва тоғларнинг қандай ўрнаштирилганига…
13. ва ернинг қандай текислаб қўйилганига?
14. Бас, эслатгин, сен, албатта, эслатувчидирсан, холос.
15. Сен уларнинг устидан ҳукм ўтказувчи эмассан.
16. Ким юз ўгирса ва кофир бўлса,
17. бас, уни Аллоҳ катта азоб билан азоблайдир.
18. Албатта, уларнинг қайтиши Бизгадир.
19. Сўнгра, албатта, уларнинг ҳисоб-китоби ҳам Бизда бўладир.

Маъно таржимаси:
1. Фажр билан қасам.
2. Ва ўн кеча билан қасам.
3. Ва жуфту тоқ билан қасам.
4. Ва юрган тун билан қасам.
5. Мана шунда ақл эгаси учун (қаноатлантирувчи) қасам борми?!
6. Роббинг Одни қандай қилганини билмадингми…
7. баланд устунли Ирамга –
8. унинг ўхшаши (бошқа) ўлкаларда халқ қилинмаганга…
9. ва водийда харсанг тошларни йўнган Самудга…
10. ва кўп қозиқлари бор Фиръавнга.
11. Улар ўлкаларда туғёнга кетган эдилар.
12. Уларда бузғунчиликни кўпайтирган эдилар.
13. Бас, Роббинг уларнинг бошига турли азобларни қуйди.
14. Албатта, Роббинг пойлаб турувчидир.
15. Бас, қачон Робби инсонни синаш учун икром қилса ва неъматлантирса, «Мени Роббим икром қилди», – дейдир.
16. Қачон Робби уни синаш учун ризқини тор қилиб қўйса, у: «Роббим мени хорлади», – дейдир.
17. Йўқ! Балки сизлар етимларни икром қилмайсизлар.
18. Бир-бирингизни мискинларга таом беришга ундамайсизлар.
19. Ва меросни жамлаб, ейсизлар.
20. Ва молни кўп яхши кўрасизлар.
21. Йўқ! Вақтики, ер парча-парча қилиб юборилса…
22. Ва Роббинг ва фаришталар саф-саф бўлиб келса…
23. Ва ўша Кунда жаҳаннам келтирилади. Ўша кунда инсон эслайдир, лекин унга эслаш(дан фойда) қани?!
24. У: «Эҳ, қани эди, ҳаётимга бирор нарса тақдим қилганимда!» – дейдир.
25. Бас, ўша Кунда Унинг азобига ўхшаш ҳеч ким азобламайдир.
26. Ва Унинг боғлашига ўхшаш ҳеч ким боғламайдир.
27. Эй хотири жам осуда нафс!
28. Роббингга сен Ундан, У сендан рози бўлган ҳолда қайт!
29. Бас, бандаларим ичига киргин!
30. Ва жаннатимга киргин!

Маъно таржимаси:
1. Мана шу шаҳар билан қасам ичаман.
2. Бу шаҳарда сен муқим тургандирсан.
3. Ва Волид ва ундан тарқаган валадлар билан қасам.
4. Батаҳқиқ, Биз инсонни машаққатда яратдик.
5. У унга ҳеч кимнинг кучи етмас, деб ҳисоблайдими?
6. У: «Кўплаб мол-дунё сарфладим», – дейдир.
7. У ўзини ҳеч ким кўрмайди, деб ҳисоблайдими?
8. Биз унга икки кўзни бермадикми…
9. ва тилни ва икки лабни?
10. Ва уни икки йўлга йўллаб қўймадикми?
11. Бас, довон ошиб ўтмади.
12. Довон не эканини сенга нима билдирди?
13. (У) қул озод қилишдир.
14. Ёки очарчилик кунида таом беришдир…
15. қариндош етимга…
16. ёки тупроққа қорилган мискинга.
17. Сўнгра иймон келтирганлар ва бир-бирини сабрга, меҳр-шафқатга чақирганлар бўлса...
18. ана ўшалар ўнг томон соҳибларидир.
19. Оятларимизга куфр келтирганлар чап томон соҳибларидир.
20. Уларнинг устиларида қоплаб турган ўт-олов бордир.

Маъно таржимаси:
1. Қуёш билан ва унинг зиёси билан қасам.
2. Унинг ортидан келган ой билан қасам.
3. Ва у(қуёш)ни равшан кўрсатган наҳор билан қасам.
4. Ва у(қуёш)ни қоплаган тун билан қасам.
5. Ва осмон билан ва унинг бино қилиниши билан қасам.
6. Ва ер билан ва унинг тўшалиши билан қасам.
7. Ва нафс билан ва унинг бекаму кўст қилиниши билан қасам.
8. Унга фужурини ва тақвосини илҳом қилди.
9. Батаҳқиқ, ким у(нафс)ни покласа, зафар топди.
10. Ва батаҳқиқ, ким уни булғаса, ноумид бўлди.
11. Самуд қавми ўз туғёни ила ёлғонга чиқарди.
12. Вақтики, унинг энг бадбахти шошилиб турди.
13. Бас, уларга Аллоҳнинг расули: «Аллоҳнинг туясига ва унинг сувига тегманглар», – деди.
14. Бас, уни ёлғончига чиқаришди ва у(туя)ни сўйишди. Бас, Робблари уларни гуноҳлари сабабли йўқ қилиб юборди ва бунда барчани баробар қилди.
15. Ва У Зот бунинг оқибатидан қўрқмас.

Маъно таржимаси:
1. Қоплаб келаётган тун билан қасам.
2. Тажалли этган кундуз билан қасам.
3. Эркак ва урғочининг яратилиши билан қасам.
4. Албатта, сизларнинг саъй ҳаракатларингиз турличадир.
5. Аммо кимки ато берса ва тақво қилса...
6. ва яхшиликни тасдиқ қилса...
7. бас, Биз уни осонга муяссар қиламиз.
8. Ва аммо кимки бахиллик ва истиғно қилса...
9. ва яхшиликни ёлғонга чиқарса...
10. бас, Биз уни қийинга муяссар қиламиз.
11. У қулаган вақтда унга мол-мулки фойда бермас.
12. Албатта, ҳидоятга бошлаш Бизнинг зиммамиздадир.
13. Албатта, ҳам охират ва ҳам бу дунё Бизникидир.
14. Бас, Мен сизларни ланғиллаган ўт-оловдан огоҳлантирдим.
15. Унга бадбахтдан бошқа кириб, куймас.
16. Ўша ёлғонга чиқарган ва юз ўгирган эди.
17. Ва албатта, ундан тақводор банда четда қоладир.
18. У мол мулкини бериб покланади
19. Бирор кишининг унда мукофотланиши лозим бўлган яхшилиги йўқ эди.
20. Фақат ўзининг олиймақом Роббининг розилигини сўраб қиладир.
21. Ва албатта, тезда рози бўладир.

Маъно таржимаси:
1. Чошгоҳ билан қасам.
2. Сукунатга чўмган тун билан қасам.
3. Роббинг сени тарк қилгани йўқ, ғазаб ҳам қилгани йўқ.
4. Ва албатта, охират сен учун бу дунёдан яхшидир.
5. Ва тезда Роббинг сенга ато қилур ва рози бўлурсан.
6. У сени етим топиб, жойлаб қўймадими?
7. Ва У сени ҳайрон ҳолда топиб, ҳидоятга бошламадими?
8. Ва У сени камбағал ҳолда топиб, бой қилмадими?
9. Аммо етимга қаҳр қилмагин.
10. Ва аммо «соил»га зажр қилмагин.
11. Ва аммо Роббингнинг берган неъмати ҳақида сўзлагин.

Маъно таржимаси:
1. Сен учун кўксингни кенг қилиб қўймадикми?
2. Ва сенинг юкингни енгиллатмадикми…
3. елкангни босиб турганни?
4. Ва сен учун зикрингни юқори кўтармадикми?
5. Бас, албатта, қийинчилик билан осончилик бордир.
6. Албатта, қийинчилик билан осончилик бордир.
7. Фориғ бўлсанг, (ибодатга) урингин.
8. Ва фақат Роббингга рағбат қилгин.

Маъно таржимаси:
1. Анжир билан ва зайтун билан қасам.
2. Сийно тоғи билан қасам.
3. Мана бу эминлик юрти (Макка) билан қасам.
4. Батаҳқиқ, инсонни энг гўзал тузилишда яратдик.
5. Сўнгра уни асфала саафилийнга қайтардик.
6. Иймон келтирганлар ва яхши амаллар қилганларга миннатсиз, битмас-туганмас ажрлар бордир.
7. Бас, нима сени охиратни ёлғонга чиқаришга олиб келур?!
8. Аллоҳ ҳукм қилувчиларнинг энг зўри эмасми?!

Маъно таржимаси:
1. Яратган Роббинг номи билан ўқи.
2. У инсонни алақдан яратди.
3. Ўқи! Роббинг карамлиларнинг карамлисидир.
4. У қалам билан илм ўргатгандир.
5. У инсонга билмаган нарсасини ўргатди.
6. Йўқ! Инсон, албатта, туғёнга кетур…
7. ўзини жуда бой кўргани учун.
8. Албатта, қайтиш Роббинггадир.
9. Қайтарганни кўрдингми…
10. бандани намоз ўқиётганида?!
11. Айтинг-чи, агар ўша ҳидоятда бўлса…
12. ёки тақвога чақирса…
13. Айтинг-чи, агар у ёлғонга чиқарса ва юз ўгирса…
14. Аллоҳ уни кўриб туришини билмасми?
15. Йўқ! Агар қайтмаса, пешона сочидан шиддат-ла тутамиз!
16. Ёлғончи, хатокор пешона сочидан!
17. Бас, у ўз тўпини чақирсин.
18. Биз ҳам забонияларни чақирурмиз.
19. Йўқ! Сен унга итоат қилма! Сажда қил ва қурбат ҳосил қил. ۩

Маъно таржимаси:
1. Албатта, Биз у(Қуръон)ни Қадр кечасида нозил қилдик.
2. Қадр кечаси не эканини сенга нима билдирди?
3. Қадр кечаси минг ойдан яхшироқдир.
4. Унда фаришталар ва Руҳ Роббларининг изни билан барча ишлар учун тушадир.
5. У то тонг отгунича салом бўлиб турадир.

Маъно таржимаси:
1. Аҳли китоб ва мушриклардан бўлган куфр келтирганлар «баййина» келмагунча, ажралмасдилар.
2. У (баййина) Аллоҳ тарафидан (юборилган) Расул бўлиб, покланган саҳифаларни тиловат қиладир.
3. Уларда тўғри битиклар бор.
4. Китоб берилганлар уларга «баййина» келганидан сўнггина бўлиниб кетишди.
5. Ҳолбуки, улар фақат Аллоҳга, динни Унга холис қилган, бошқадан унга бурилган ҳолда ибодат қилишга, намозни тўкис адо этишга, закот беришга буюрилган эдилар, холос. Ана шу тўғри(миллат)нинг динидир.
6. Албатта, аҳли китоб ва мушриклардан бўлган куфр келтирганлар жаҳаннам оташидадирлар, унда мангу қолувчидирлар. Ана ўшалар халойиқнинг энг ёмонидирлар.
7. Албатта, иймон келтирганлар ва солиҳ амалларни қилганлар – ана ўшалар халойиқнинг энг яхшисидир.
8. Уларнинг мукофотлари Робблари ҳузуридаги остларидан анҳорлар оқиб турган адн жаннатларидир. Унда абадий – мангу қолувчидирлар. Аллоҳ улардан рози бўлди, улар ҳам Ундан рози бўлдилар. Бу Роббидан қўрққанлар учундир.

Маъно таржимаси:
1. Вақтики, ер ўзига хос зилзилага тушса...
2. ва ер ўз юкларини отиб чиқарса...
3. ва инсон: «Унга нима бўлди?!» – деса...
4. ўша Кунда у (ер) ўз хабарларини айтадир.
5. Сенинг Роббинг унга ваҳий юборгани учундир.
6. Ўша Кунда одамлар амалларини кўриш учун жойларидан алоҳида алоҳида бўлиб қўзғалурлар.
7. Бас, ким зарра вазнича яхшилик қилса ҳам кўрадир.
8. Ва ким зарра вазнича ёмонлик қилса ҳам кўрадир.

Маъно таржимаси:
1. Ҳарсиллаб чопувчи отлар билан қасам.
2. Ўт чақнатиб чопувчи отлар билан қасам.
3. Тонг чоғи ғарот қилувчи отлар билан қасам.
4. Ўша ила чанг қўзғатдилар..
5. Ва у ила жамоа ўртасига (ёриб) кирдилар.
6. Албатта, инсон ўз Роббига ношукрдир.
7. Ва албатта, у ана шунга ўзи гувоҳдир.
8. Албатта, у мол-дунёга ниҳоятда ўчдир.
9. У билмасми?! Қабрдагилар қўзғатилганда…
10. ва кўкслардаги нарсалар тўпланиб, намоён қилинганда…
11. ўша Кунда Робблари улардан хабардор эканини?!

Маъно таржимаси:
1. Қориъа.
2. Қориъа нима?
3. Қориъа не эканини сенга нима билдирди?
4. У Кунда одамлар тўзиб кетган капалакка ўхшаб қоларлар.
5. Ва тоғлар титилган жунга ўхшаб қоларлар.
6. Кимнинг тарозиси оғир келса...
7. бас, у розилик ҳаётидадир.
8. Ва аммо кимнинг тарозиси енгил келса...
9. бас, унинг онаси «ҳавия»дир.
10. У не эканини сенга нима билдирди?
11. У қаттиқ қизиган ўтдир.

Маъно таржимаси:
1. «Кимники кўп» сизни машғул қилди…
2. то қабрларни зиёрат қилгунингизча.
3. Йўқ! Тезда биласиз!
4. Яна йўқ! Тезда биласиз!
5. Йўқ! Агар аниқ илм ила билганингизда эди…
6. Албатта жаҳаннамни кўрасиз.
7. Ва яна албатта уни ишонч кўзи билан кўрасиз.
8. Сўнгра ўша Кунда албатта неъматланишдан сўраласиз.

Маъно таржимаси:
1. Аср билан қасам.
2. Албатта, инсон зиёндадир.
3. Фақат иймон келтирганлар ва солиҳ амалларни қилганлар, бир-бирларини ҳақ йўлга чақирганлар ва бир-бирларини сабрга чақирганлар мустасно.

Маъно таржимаси:
1. Ҳар бир обрў тўкувчи ва айбловчига вайл бўлсин.
2. У мол жамлади ва уни санаб турур.
3. У, албатта, мол мулки уни мангу қолдирур деб ҳисоблар.
4. Йўқ! Албатта, у «ҳутома»га улоқтирилур.
5. «Ҳутома» не эканини сенга нима билдирди?
6. У Аллоҳнинг ўчмас ўтидир.
7. Қалбларгача етиб борадигандир.
8. Албатта, у уларнинг устидан қоплангандир.
9. Узун-узун устунларга боғлангандир.

Маъно таржимаси:
1. Роббинг фил соҳибларини нима қилганини билмадингми?
2. Уларнинг макру ҳийласини зое кетказмадими?
3. Ва уларнинг устига тўп-тўп қушларни юбормадими…
4. лойдан пиширилган тошларни отадиган?
5. Бас, уларни қурт еб ташлаган ўсимликка ўхшатиб юбормадими?

Маъно таржимаси:
1. Қурайшнинг лозим тутиши учун!
2. Уларнинг қиш ва ёз сафарларини лозим тутиши учун!
3. Бас, мана шу Байтнинг Роббига ибодат қилсинлар.
4. У уларни очликдан тўқ қилган, хавфдан омон қилгандир.

Маъно таржимаси:
1. Жазо мукофотни ёлғонга чиқарувчини кўрдингми?
2. Етимни қўполлик билан ҳайдайдиган ўшадир.
3. Ва мискинларга таом беришга қизиқтирмайдир.
4. Бир «намозхонлар»га вайл бўлсинки…
5. улар намозларини унутувчилардир.
6. Улар риё қиладиганлардир.
7. Ва мааъуунни ман қиладиганлардир.

Маъно таржимаси:
1. Албатта, Биз сенга кавсарни бердик.
2. Бас, Роббингга намоз ўқи ва жонлиқ сўй.
3. Албатта, сени ёмон кўриб, айбловчининг ўзининг орқаси кесик.

Маъно таржимаси:
1. Айт: «Эй кофирлар...
2. (Мен) сиз ибодат қилган нарсаларга ибодат қилмасман.
3. Ва сизлар ҳам мен ибодат қиладиган нарсага ибодат қилувчимассиз.
4. Ва (мен) сиз ибодат қилган нарсага ибодат қилувчимасман.
5. Ва сизлар ҳам мен ибодат қиладиган нарсага ибодат қилувчимассиз.
6. Сизга ўз динингиз ва менга ўз диним».

Маъно таржимаси:
1. Вақтики, Аллоҳнинг нусрати ва фатҳ келса...
2. ва одамларнинг Аллоҳнинг динига тўп-тўп бўлиб кираётганларини кўрсанг...
3. бас, Роббингни ҳамд ила поклаб ёд эт ва Ундан мағфират сўра. Албатта, У тавбани кўплаб қабул қилувчидир.

Маъно таржимаси:
1. Абу Лаҳабнинг икки қўли ҳалок бўлсин, ҳалок!
2. Унга моли ва касб қилган нарсалари фойда бермади.
3. У тезда алангали ўтга кириб, куядир.
2. Ва унинг ўтин кўтарган хотини ҳам.
3. Унинг бўйнида эшилган арқон.

Маъно таржимаси:
1. Айт: «У – Аллоҳ ягонадир.
2. Аллоҳ Сомаддир.
3. У туғмаган ва туғилмаган.
4. Ва Унга ҳеч ким тенг бўлмаган».

Маъно таржимаси:
1. Айт: «Тонг Роббидан паноҳ сўрайман.
2. У яратган нарсалар ёмонлигидан…
3. ва кириб келган қоронғу кечанинг ёмонлигидан...
4. ва тугунларга дам солувчилар ёмонлигидан...
4. ва ҳасад қилган ҳасадчининг ёмонлигидан (паноҳ сўрайман)».

Маъно таржимаси:
1. Айт: «Одамлар Роббидан паноҳ сўрайман...
2. одамлар Подшоҳидан...
3. одамлар Илоҳидан...
4. беркиниб, кўриниб турувчи васвасачининг...
5. одамларнинг кўксларига васваса соладиганнинг...
6. жинлар ва одамлардан бўлганнинг ёмонлигидан (паноҳ сўрайман)».